Амстердамнинг "Аякс" клуби ярим ҳимоячиси Муҳаммад Кудус клубини ўзгартиришни интиқлик билан кутмоқда. Инсайдер Давид Орнштейннинг сўзларига кўра, ганалик футболчи январь ойидаги трансфер ойнасидаёқ Амстердамни тарк этмоқчи.
Футболчига даъвогарлар орасида Англия Премьер-лигаси, Франция 1-лигаси ва Германия Бундеслигаси клублари бор. Қудуснинг ўзи Туманли Альбионда ўйнашни хоҳламоқда.
Ушбу жаҳон чемпионатида Қудус яхши таассурот қолдирди ва гуруҳ босқичининг учта ўйинида Гана терма жамоаси сафида иккита гол урди.
Аввалроқ, "Аякс" футболчини 40-50 миллион евро эвазига қўйиб юборишга тайёр экани хабар қилинганди. Унинг амстердамликлар билан шартномаси 2025 йилнинг ёзига қадар мўлжалланган.
