Аёллар ўртасида 50 метрга милтиқдан ўқ отиш мусобақасида спортчилар саралаш баҳсларини якунлаб бўлишди. Мерганлар ётган, тик турган ҳолда ва тиззалаб ўқ отиш баҳсини амалга оширишди. Улар ҳар бир йўналишда 20тадан, жами 60та ўқни нишонга йўллашди.

Ўзбекистонлик Сакина Мамедова ётиб ўқ отиш бўйича 200 имкониятдан 192 балл тўплаб, 43-ўринда бораётганди. Кейинги баҳсларда ҳамюртимиз натижаларини яхшилади ва 600 имкониятдан 578 очко тўплаб, 22-ўринга кўтарилиб олди. Сакина тик туриб ўқ отишда 192, тиззалаб ўқ отишда 194 очко тўплади. Афсуски, бу натижа Мамедовага финал баҳсида иштирок этиш имкониятини бермади.

Саралаш мусобақасидан сўнг пешқадамликни АҚШлик Жеми Лин Грей эгаллаб турибди — 592 очко. Ундан 2 очко кам очко жамғарган Ивана Максимович 2-ўринни олди. 3-ўрин эса Дария Вдовинага тегишли бўлди — 585 очко. Финал йўлланмасини тақдим этган 8-ўриндаги спортчи билан Сакина Мамедовани атиги 5 очко ажратди.