Саудия Арабистони терма жамоаси бош мураббийи Эрве Ренар Марокаш терма жамоасининг ЖЧ-2022даги ўйини ҳақида фикр билдирди.
"Мен францияликман, менда Франция паспорти бор, лекин мен Марокашга мухлислик қиламан", - деди Ренар RMC билан суҳбатда.
"Агар сиз асосий фаворит бўлсангиз, у ҳолда йўқотадиган нарсангиз бўлади. Марокашда ғалаба қозониш учун ҳамма нарса бор. Қайсидир маънода, улар қилган ишларини ҳисобга олиб айтадиган бўлсак, улар аллақачон ғалаба қозонишган", - дея қўшимча қилди мутахассис.
Эрве Ренарнинг ўзи Марокаш терма жамоасини 2016 йилдан 2019 йилгача бошқарган ва уни 20 йил ичида илк бор жаҳон чемпионатига олиб чиқишга муваффақ бўлган.
Саудия Арабистони терма жамоаси билан Ренар ЖЧ-2022 гуруҳ босқичининг биринчи турида Аргентина терма жамоасини мағлуб этди, аммо якунда саудияликлар плей-оффга чиқа олишмади.
