"Бухоро"-"Нефтчи" ўйинидан сунг стадионнинг "MIX ZONE" жойида қатор футболчиларни 10-15 нафар журналистлар кутиб олишди. Футболчилар уларни қизиктирган саволларга жавоб қайтаришди.

Биз "Бухоро" таркибида ушбу ўйинда энг яхши футболчи номига сазовор булган футболчи Девид Ония билан қисқача суҳбат уюштирдик.

— Девид, ўйин ҳақидаги фикрингиз билан ўртоқлашсангиз.
— Бу ўйин биз учун жуда оғир кечди. Биз бир ярим бўлим мобайнида бир киши кам бўлиб ўйнадик. Биз асосан биринчи бўлимда жуда қийналдик.

— Ҳакамнинг антиқа қарорлари ва қизил карточкаси ҳақида нима дея оласиз?
— Бунақанги ҳолатлар билан шуғулланадиган алоҳида ташкилотлар, учрашув назоратчиси бор. Менимча, улар бу ҳолатни ўрганиб чиқишади, албатта. Мен ҳакамларни муҳокама қилмайман, бу менинг вазифамга кирмайди.

— "Нефтчи" жамоаси ҳақида нима дея оласиз?
— Жамоа анча тажрибали, халқаро ўйинларда тажриба тўплаган жамоа сирасига киради. Бу жамоа билан ҳар доим ҳам ўйнаш қийин кечади. Гарчи биз бугун тўлиқ устунлик қилган бўлсак-да, лекин барибир "Нефтчи"дан хавф тўсатдан пайдо бўлишини билардик.

— Бугун "Бухоро" ғалабага жуда яқин эди.
— Бугун биз ғалабага ҳақли эдик, буни сифатли ва чиройли ўйин мисолида исботладик ҳам. Лекин ўша қизил карточка бўлмаганида, ҳисоб умуман бошқача кўринишда бўларди, буни аниқ айта оламан.

— Ҳисоб тенглашганидан сўнг яна бир нечта голли вазият вужудга келганди.
— Мухлислар фантастик тарзда қўллаб-қувватлашди бизни, бунга жавобан биз ҳам бор кучимиз билан ўйнадик. Бу даражадаги мухлислар томонидан қўллаб-қувватлашни анчадан бери кузатмагандим, ҳар бир ҳаракатга алоҳида муносабат билдиришди мухлислар, албатта бу жуда ёқимли. Халкаро турнирларда, Европада ўйнаётгандай муҳитга тушиб қолдик бугун. Бухоро ишқибозлари ҳақидаги таърифларни эшитгандим, лекин бу даражада эканнини умуман тасаввур қилмагандим.

— Сиз бугун ўйиннинг энг яхши футболчисига айландингиз.
— Бу учрашувда барча ажойиб ўйнади. Асосийси, жамоамга фойдам тегса бўлгани!