Қатардаги жаҳон чемпионати эртага якунига етади. Турнирдаги интригалардан бири — энг яхши тўпурарга бириладиган "Олтин бутса" соврини кимга насиб этиши бўлиб турибди. Олдиндан айтиш керакки, мусобақада, шунингдек, "кумуш бутса" ва "бронза бутса"лар ҳам ўз эгаларига топширилади.

Айни пайтда мазкур совринларга 4 нафар футболчи даъвогарлик қилмоқда:

Лионель Месси (Аргентина) — 5 гол
Килиан Мбаппе (Франция) — 5 гол
Оливье Жиру (Франция)  — 4 гол
Хулиан Альварес (Аргентина) — 4 гол

Хўш, соврин эгалари қандай тамойилларга кўра аниқланади?

"Олтин бутса" мусобақада энг кўп гол урган футболчига берилади. Агар икки ёки ундан кўп футболчиларнинг урган голлари сони тенг бўлса, унда ҳар бир футболчининг голларга ассистентлик қилгани (бу ФИФАнинг махсус техник гуруҳи томонидан ҳисобланади) инобатга олинади.

Мбаппе ва Месси ҳисобида 5тадан гол бор. Финалдан кейин ҳам уларнинг голлари сони тенг бўлса, улар амалга оширган ассистлар сони инобатга олинади. Ҳозирча Леода 3та, Килианда эса 2та ассист бор. Шунинг учун ҳозирча аргентиналик футболчи юқорида турибди.

Юқоридаги 4 футболчининг ассистлар бўйича кўрсаткичлари қуйидагича:

Лионель Месси (Аргентина) — 3 ассист
Килиан Мбаппе (Франция) — 2 ассист
Оливье Жиру (Франция)  — 0 ассист
Хулиан Альварес (Аргентина) — 0 ассист

"Гол+пас"дан кейин ҳам икки ёки ундан ортиқ футболчи бир хил натижа қайд этиб турган бўлса, унда футболчиларнинг майдонда ўтказган вақти ҳисобланади ва майдонда энг кам вақт ўйнаган футболчи ғолиб деб топилади.

"Кумуш" ва "Бронза бутса"лар соҳиблари тўпурарлар баҳсида иккинчи ва учинчи ўринларга эгаллаган футболчиларга берилади.