Qatardagi jahon chempionati ertaga yakuniga yetadi. Turnirdagi intrigalardan biri — eng yaxshi to‘purarga biriladigan "Oltin butsa" sovrini kimga nasib etishi bo‘lib turibdi. Oldindan aytish kerakki, musobaqada, shuningdek, "kumush butsa" va "bronza butsa"lar ham o‘z egalariga topshiriladi.

Ayni paytda mazkur sovrinlarga 4 nafar futbolchi da’vogarlik qilmoqda:

Lionel Messi (Argentina) — 5 gol
Kilian Mbappe (Fransiya) — 5 gol
Olivye Jiru (Fransiya)  — 4 gol
Xulian Alvares (Argentina) — 4 gol

Xo‘sh, sovrin egalari qanday tamoyillarga ko‘ra aniqlanadi?

"Oltin butsa" musobaqada eng ko‘p gol urgan futbolchiga beriladi. Agar ikki yoki undan ko‘p futbolchilarning urgan gollari soni teng bo‘lsa, unda har bir futbolchining gollarga assistentlik qilgani (bu FIFAning maxsus texnik guruhi tomonidan hisoblanadi) inobatga olinadi.

Mbappe va Messi hisobida 5tadan gol bor. Finaldan keyin ham ularning gollari soni teng bo‘lsa, ular amalga oshirgan assistlar soni inobatga olinadi. Hozircha Leoda 3ta, Kilianda esa 2ta assist bor. Shuning uchun hozircha argentinalik futbolchi yuqorida turibdi.

Yuqoridagi 4 futbolchining assistlar bo‘yicha ko‘rsatkichlari quyidagicha:

Lionel Messi (Argentina) — 3 assist
Kilian Mbappe (Fransiya) — 2 assist
Olivye Jiru (Fransiya)  — 0 assist
Xulian Alvares (Argentina) — 0 assist

"Gol+pas"dan keyin ham ikki yoki undan ortiq futbolchi bir xil natija qayd etib turgan bo‘lsa, unda futbolchilarning maydonda o‘tkazgan vaqti hisoblanadi va maydonda eng kam vaqt o‘ynagan futbolchi g‘olib deb topiladi.

"Kumush" va "Bronza butsa"lar sohiblari to‘purarlar bahsida ikkinchi va uchinchi o‘rinlarga egallagan futbolchilarga beriladi.