Франция терма жамоаси бош мураббийи Дидье Дешам журналистлар билан суҳбатда Қатардаги мундиалнинг финал учрашувидаги ҳакамликка баҳо берди.
Дешамнинг айтишича, журналистлар унга умуман бу саволни бермасалар яхши бўларди. Мураббий ўз сўзида эҳтиёткор бўлиши кераклигини, бироқ ҳакамлик ҳам яхшироқ, ҳам ёмонроқ бўлиши мумкинлигини таъкидлади.
"Мен Аргентинани ушбу турнирда ғалаба қозонишдаги хизматларидан маҳрум қилмоқчи эмасман. Аргентина терма жамоасини ушбу муваффақият билан табриклайман", - дея қўшимча қилди Дешам.
Эслатиб ўтамиз, Дешам шогирдлари финал ўйинида пенальтилар сериясида аргентиналикларга имкониятни бой бериб, кетма-кет иккинчи жаҳон чемпионатида чемпион бўлиш имкониятини қўлдан бой беришди.
