Июль ойининг энг яхши мураббийи деб Тачмурод Агамуродов, энг яхши футболчиси деб эса Одил Аҳмедов топилди.

Ўзбекистон футбол федерацияси матбуот хизмати оммавий ахборот воситалари овозига кўра июль ойи лауреатларини аниқлаб олди. Иккинчи даврадан бошлаб «Бухоро» клубини қабул қилиб олган Тачмурод Агамуродов йил бошидан бери илк бор энг яхши дея эътироф этилган бўлса, Одил Аҳмедов бунга қадар март ва апрель ойларида ҳам рақобатчиларини ортда қолдирганди.

Тачмурод Агамуродов бунга қадар йил бошидан бери кучли учликка ҳам бирор марта кира олмаганди. Ўзбекистон миллий терма жамоасининг собиқ бош мураббийи Вадим Абрамов 2012 йилнинг дастлабки икки ойида ўзини кўрсатган бўлса, қолган тўрт ойда «Бунёдкор» клуби ва Ўзбекистон миллий терма жамоасининга амалдаги бош мураббийи Миржалол Қосимов лидерликни ҳеч кимга бермаганди. Бу сафар Қосимов Агамуродов билан рақобат якунига кўра иккинчи ўрин билан чекланди. Учинчи ўрин эса «Пахтакор»ни яқиндагина қабул қилиб олган Мурод Исмоиловга насиб қилди.

Қайд этиш керак, «Бухоро» клубининг Ўзбекистон Кубоги ярим финалига қадар етиб келиши Агамуродовнинг муваффақиятида муҳим рол ўйнади. Икки ўйин натижасига кўра бухороликлар Тошкентнинг «Локомотив» клубини ортда қолдиришганди.

Одил Аҳмедов эса қолган футболчиларни яққол фарқ билан ортда қолдирмоқда. Ҳозирга қадар ундан бошқа бирор бир футболчи ҳеч бўлмаганда икки марта энг яхши бўла олмаган. Аҳмедовга эса бу борада омад учинчи бор кулиб боқмоқда. Қаршининг «Насаф» клуби сафига келиб қўшилган Владимир Шишелов сўровнома якунига кўра иккинчи ўрин билан чекланди. У бунга қадар май ойида ҳам Игнатий Нестеровдан кейин иккинчи бўла олганди. Киевнинг «Арсенал» клуби шарафини ҳимоя қилаётган Максим Шацкихга учинчи ўрин насиб қилди.