"Барселона" бош мураббийи Хави Аргентина терма жамоаси ҳужумчиси Лионель Мессини Қатарда бўлиб ўтган 2022 йилги жаҳон чемпионатидаги ғалабаси билан табриклади.
18 декабрь, якшанба куни аргентиналиклар турнир финалида Францияни мағлуб этишди (3:3, пенальтилар сериясида – 4:2).
“Бу томошабинлар учун ақл бовар қилмайдиган ўйин бўлди, мен бутун ҳаётим давомида кўрган энг яхши учрашувлардан бири эди. Менимча, Аргентина кучлироқ ва ғалабага лойиқ эди. Мен футболчиларим Дембеле ва Кундега ачинаман, лекин ниҳоят жаҳон чемпионлигини қўлга киритган Лионель Мессини табриклашим керак. Бу унинг фаолиятида етишмаётган нарса эди. Лео - тарихдаги энг яхши футболчи ва менинг дўстим", - деди Хави "Барселона" клуби каналига берган интервьюсида.
Хави ва Месси 2003 йилдан 2015 йилгача "Барселона"да бирга ўйнашган.
