Марокаш терма жамоаси футболчилари 2022 йилда Қатарда бўлиб ўтган жаҳон чемпионатида қўлга киритган барча мукофот пулларини ўз мамлакатидаги кам таъминланган оилаларга ёрдам бериш учун жўнатишга қарор қилди, дея хабар беради журналист Холид Бейдун.

Марокашликлар жаҳон чемпионатининг ярим финалига қадар етиб борган ва у ерда Францияга имкониятни бой берган (0:2). Учинчи ўрин учун кечган баҳсда Хорватияга имкониятни бой берди (1:2).

AP хабарига кўра, Марокаш терма жамоаси ўз ўйинлари орқали тахминан 25 миллион доллар ишлаб топган.

Марокашликлар жаҳон чемпионати тарихида турнирнинг ярим финалига чиқишга муваффақ бўлган илк Африка терма жамоасига айланди. Илгари ушбу қитъа жамоаларининг энг яхши натижаси чорак финал ўйинлари бўлган.

Аввалроқ Марокаш қироли Работдаги саройда терма жамоа футболчилари ва уларнинг оналари билан учрашгани хабар қилинганди.