"Арсенал" бош мураббийи Микель Артета қишда "Ювентус" ярим ҳимоячиси Адриен Рабьони сотиб олмоқчи. Бу ҳақда Daily Mail нашри хабар бермоқда.
Қатарда бўлиб ўтган жаҳон чемпионатида Рабьо турнирнинг кумуш медали соҳибига айланди. Франция Аргентинага финал учрашувининг асосий ва қўшимча таймларидан кейингина пенальтилар сериясида мағлуб бўлди. Турнирда Рабьо Дидье Дешамнинг асосий ярим ҳимоячилардан бири бўлди.
Умуман олганда, ярим ҳимоячи жорий мавсумда клуб миқёсида 16 та ўйинда майдонга тушиб, 5 та гол урди ва 2 та голли узатмани амалга оширди. Жаҳон чемпионатида Рабьо майдонда 6 та ўйин ўтказиб, битта гол ва битта голли узатмани амалга оширган.
"Арсенал" Премьр-лигада пешқадам ва иккинчи ўриндаги "Манчестер Сити"дан 5 очко олдинда.
