АГМК 2023 йилги мавсум сўнгига қадар Насаф сингари лойиҳага айланади. Яъни, ўз стадиони, академияси ва базаси мавжуд бўлган футбол клубига.  

Январь ойида АГМК стадиони майсаси ҳамда дренаж тизимини алмаштириш, прожекторларни 2100 люксга етказиш ишлари бошланади. Катта эҳтимол билан апрель ойида стадион ўйинларни қабул қилишга тайёр бўлади. Март ойида клуб уй учрашувларини "Жар" стадионида ўтказиши мумкин.  

ОКМК спорт комплекси футбол клуби учун узоқ йилга ишончли бошқарувга берилади. Шунингдек, клуб академиясини қуриш ишлари бошланади. Академия Тошкент ва водий ўртасида жойлашгани катта ютуқ. У Ангрен, Оҳангарон, Олмалиқ шаҳарлари учун жуда қулай жойда барпо этилиши режалаштирилган.

АГМК август ойида Чемпионлар лигасининг саралашидан муваффақиятли ўта олса, гуруҳ босқичига йўлланма олади ва газони талабга жавоб бера оладиган стадионда уй учрашувларини қабул қилади.

ОКМК раҳбарига илиқ ва самимий учрашув учун миннатдорчилик билдирамиз. Вақт ўта зиқ фаолияти давомида ҳам адабиёт, тарих ва илмга вақт ажрата оладиган шахслар доим ҳурматга лойиқ.

Диёр Имомхўжаев.