Франциянинг "Лион" клуби “Зенит” ҳимоячиси Деян Ловрен трансферини тасдиқлади. 33 ёшли футболчи француз жамоаси билан 2025 йилнинг ёзига қадар шартнома имзолади. Бу ҳақда "Лион" расмий сайти хабар берди.

Олдинроқ "Зенит" Ловрен кетгани учун 2 миллион евро миқдорида товон пули олиши хабар қилинганди.33 ёшли хорватиялик футболчининг Петербург билан шартномаси 2023 йилнинг ёзида якунига етади.

Хорватиялик ҳимоячи 2020 йилдан буён "Зенит"да тўп суради, у Англиянинг "Ливерпуль" клубидан ўтганди. "Кўк-оқ-кўклар" таркибида Ловрен 63 ўйин ўтказиб, учта гол урди ва учта голли узатмани амалга оширди. Петербургликлар билан биргаликда ҳимоячи икки карра мамлакат чемпиони бўлди ва икки марта Россия Суперкубогини қўлга киритди.

Ловрен 2010 йилнинг январидан 2013 йилнинг ёзигача "Лион" футболчиси бўлган.