Ҳимоячи Иньиго Мартинес Бильбаонинг "Атлетик" клубидан "Барселона"га ўтишга яқин турибди. Бу ҳақда Испаниянинг Sport нашри ўз саҳифаларида хабар бермоқда.
Катта эҳтимол билан Иньиго Мартинес ёзги трансфер ойнасида "Камп Ноу"га ўтади. Бу вақтга келиб ҳимоячи 32 ёшга тўлади.
Сўнгги йилларда миш-мишлар мунтазам равишда Иньиго Мартинесни "Барселона" билан боғлаб турди. Ҳимоячи "Атлетик"да деярли беш йилдан бери ўйнаб келмоқда. Бу вақт ичида футболчи 169 та расмий ўйин ўтказиб, 7 та гол урди ва 7 та голли узатмани амалга оширди.
Иньиго Мартинеснинг "Атлетик" билан амалдаги шартномаси 2022/2023 йилги мавсум охиригача тузилган.
