Ҳозиргина Германия суперкубоги учун баҳс ўз якунига етди. Амалдаги мамлакат чемпиони ва кубоги соҳиби Дортмунднинг "Боруссия" клуби кубок финалчиси "Бавария" билан ўзаро баҳс олиб борди.

Мавсумнинг илк расмий ўйини эса мюнхенликларнинг устунлигида ўтди дейиш мумкин. Учрашувнинг дастлабки 10 дақиқасидаёқ "Бавария" 2:0 ҳисобида олдинга чиқиб олган ва рақибини шок ҳолатига тушириб қўя олган эди. Дастлаб "Бавария" сафида расмий дебютни нишонлаган Марио Манжукич ҳисобни очган бўлса, орадан кўп ўтмай Томас Мюллер орадаги фарқни иккитага етказиб қўйди.

Шундан сўнг ўйин бироз "Боруссия" футболчиларининг устунлигида ўтди. Аммо улар фақат биргина жавоб тўпини киритишнинг уддасидан чиқа олишди ҳолос.

Ўйин тугашига 15 дақиқа қолганда Мариуш Левандовски гол муаллифига айланди.

Ушбу ҳисоб эса ўйин якунига қадар ўзгармади. "Бавария" Германияда мавсумнинг илк совринини қўлга киритди.

Бавария (Мюнхен) – Боруссия  (Дортмунд) – 2:1

Голлар: Манджукич, 6 (1:0); Мюллер, 11 (2:0); Левандовски, 75 (2:1).

Огоҳлантиришлар: Густаво, 28; Кан, 37; Манджукич, 68; Роббен, 82 – Шмельцер, 42.