"Милан" ҳужумчиси Златан Ибраҳимович тез орада майдонга қайтиши мумкин.
41 ёшли швед жиддий жароҳатидан фориғ бўлишда давом этмоқда, шу сабаб жорий мавсумда бирорта ҳам ўйин ўтказмади. Стефано Пиолининг сўзларига кўра, ҳужумчи тез орада касалхонани тарк этади:
"Аввалдан режалаштирилганидек, Златан кейинги ҳафтада қайтади. Шундан сўнг биз унинг ҳолатига баҳо берамиз ва қачон яна майдонга тушишини билиб оламиз”, - деди “россонерилар” устози.
8 январь куни "Милан" А серия доирасида "Рома"ни қабул қилади. Айни дамда Италиянинг амалдаги чемпиони турнир жадвалида учинчи ўринда бормоқда.