"Манчестер Сити" бош мураббийи Пеп Гвардиола жамоаси яна Лига кубогида ғалаба қозонишни исташини айтди.
Эслатиб ўтамиз, эртага "шаҳарликлар" турнирнинг чорак финалида сафарда "Саутгемптон"га қарши баҳс олиб боради. Дастлабки икки босқичда “Манчестер Сити” ўтган йилги финалчилар "Челси" ва "Ливерпул"ни мусобақадан чиқариб юборди.
"Албатта, биз яна Лига кубогини ютиб олишни истаймиз, аммо бу турнирда ғалаба қозониш ҳаётимни ўзгартирмайди. Биз буни ўтган мавсумда ҳам қилишга ҳаракат қилдик, аммо ажойиб ўйин кўрсатганимизга қарамай, бизни “Вест Хэм" эртароқ мағлуб этди. Энди биз ушбу турнирда яна иштирок этмоқдамиз ва яна ғалаба қозонишни истаймиз", - деди Гвардиола матбуот анжуманида.
Гвардиола мураббийлик фаолияти давомида "Манчестер Сити" билан 4 марта Лига кубогини қўлга киритган.
