Дортмунднинг "Боруссия" клуби ижрочи директори Ханс-Йоахим Вацке ҳужумчи Юсуф Мукоко билан шартнома борасидаги вазиятга изоҳ берди. Томонлар ўртасидаги келишув мавсум охирида ўз ниҳоясига етади.
"Агар иккала томоннинг ғоялари тўғри келмаса, Юсуф биз учун ўйнашда давом этмайди, аммо бу сўнгги чора. Бу содир бўлиши мумкин, лекин, албатта, Мукоко биз билан қолади деб умид қиламиз", - дея Вацке сўзларидан иқтибос келтирган Sky Germany.
Юсуф Мукоко "Боруссия" таркибига 2016 йилнинг ёзида 12 ёшида келиб қўшилган эди. Жорий мавсумда у барча мусобақаларда 22 та ўйинда 6 та гол урди ва 6 та голли узатмани амалга оширди. Аввалроқ "Барселона" футболчига фаол қизиқиш билдираётгани, Мукоконинг ўзи ҳам фаолиятини Каталония пойтахтида давом эттиришга қарши эмаслиги ҳақида хабар берилганди.
