Американинг Forbes журнали 2022-йил давомида энг кўп маблағ ишлаб топган спортчилар рейтингини эълон қилди.
Унга кўра, биринчи поғонага Қатардаги жаҳон чемпионатида Аргентина терма жамоасига бош совринни тақдим этган Лионел Месси жойлаштирилди. 35 ёшли тажрибали ҳужумчи ўтган йил давомида 108 миллион фунт ишлаб топганди.
Иккинчи ўриндан баскетбол юлдузи ЛеБрон Жеймс ўрин олди. Тажрибали спортчининг йиллик даромади 101 миллион фунтни ташкил қилди.
Яқинда Саудия Арабистонининг “Ал Наср” клуби билан шартнома имзолаган португалиялик 37 ёшли ҳужумчи Криштиану Роналду кучли учликка кирди. Роналду ўтган йили жами 96 миллион фунт ишлаб топган.
Тўртинчи ўрин Бразилия терма жамоаси ҳужумчиси Неймарга насиб қилди. 30 ёшли юлдуз 12 ой мобайнида 79 миллион фунтга эга чиқди.
