Дортмунднинг "Боруссия" клуби ва Германия терма жамоаси ҳужумчиси Юсуф Мукоко ёшни сохталаштиришда гумонланмоқда.

Расмий маълумотларга кўра, футболчи 2004 йилнинг 20 ноябрида Камерунда туғилган - ҳозир у 18 ёшда. Бироқ, манбага кўра, Мукокони асраб олган отаси футболчининг ҳақиқий туғилганлик гувоҳномасини топширган. Ушбу ҳужжат Юсуф Муҳаммад Мукоконинг ҳақиқий исми ва 2000 йилда туғилганлигини кўрсатади.

Қайд этилишича, Мукоконинг туғилганлик ҳақидаги гувоҳномасини журналистларга тақдим этган асраб олувчи отаси кейинчалик ҳужжатнинг чоп этилишига қонуний тўсқинлик қилган.

Аввалроқ оммавий ахборот воситалари Камерун U-17 30 нафардан 21 нафари ёш тестларидан ўта олмагани ҳақида хабар берилганди.

Жорий мавсумда ҳужумчи “Боруссия” сафида барча турнирлар доирасида 22 та ўйинда майдонга тушиб, 6 та гол урди ва 6 та голли узатмани амалга оширди. Унинг клуб билан шартномаси 2023 йилнинг ёзига қадар мўлжалланган.