"Реал" ярим ҳимоячиси Эдуард Камавинганинг агенти Жошуа Барнетт футболчининг Мадрид клубини тарк этиши мумкинлиги ҳақидаги миш-мишларга изоҳ берди.
Олдинроқ "Арсенал" франциялик ярим ҳимоячини ижарага олмоқчилиги ҳақида хабарлар тарқалган эди.
"Бу ёлғон. Албатта, дунёнинг ҳар бир клуби уни ўз сафида кўришни хоҳлайди, лекин у "Реал Мадрид"да, мадридликлар эса Камавингадан жуда хурсанд", - дея Барнеттнинг сўзларини келтиради Sky Sports Italia.
Камавинга 2021 йилдан бери "Реал"да ўйнаб келмоқда. Унинг Мадридликлар билан амалдаги шартномаси 2027 йилгача мўлжалланган.
20 ёшли ярим ҳимоячи жорий мавсумда барча турнирларда 26 та ўйинда майдонга тушди ва битта голли узатмани амалга оширди. Transfermarkt порталига кўра футболчининг нархи 50 миллион еврога баҳоланмоқда.
