Кеча бўлиб ўтган “Шўртан” - “Андижон” (6:1) жамоалари ўртасидаги баҳсдан сўнг, “Андижон” жамоаси бош мураббийи Александр Аверьянов ўз лавозимини тарк этиши ҳақидаги фикрлар кўпайиб кетди.
Мана шу саволга аниқлик киритиш мақсадида “бургутлар” жамоаси бош мураббийи билан учрашдик ва масалага ойдинлик киритиб олдик.
— Александр Николаевич, гап-сўзларга қараганда ўз лавозимингизни тарк этибсиз?
— Ҳа, ҳақиқатдан ҳам ўз лавозимимни тарк этдим. Бугун ва эрта дам олиш кунлари, шу боис Тошкентда қоламан ва душанба куни Андижонга бориб, нарсаларимни йиғиштириб ортга қайтаман.
— Бундай қарорга келишингизга “Шўртан” билан бўлиб ўтган учрашув сабаб бўлдими?
— Йўқ, мен бундай демаган бўлардим.
— Жамоани ўз хохишингиз билан тарк этяпсизми?
— Икки томоннинг талаблари инобатга олинди ва ўзаро келишган ҳолда жамоани тарк этдим.
Эслатиб ўтамиз, Александр Николаевич жорий мавсум аввалида жамоани қабул қилиб олганди ва ҳозирги кунга келиб унинг қўл остидаги “Андижон” турнир жадвалининг энг сўнгги поғонасини эгаллаб турибди.













