Кириш Регистрация
28/03 19:00 Динамо - Металлург
29/03 19:00 ОКМК - Бунёдкор
29/03 19:15 Қизилқум - Локомотив

Эрлинг Холанд мавсум ярмида Салоҳ ва Соннинг ўтган йилги "Олтин бутса" рекордини бузишга улгурди. Норвегиялик яна қандай ақлбовар қилмас натижалар қайд этмоқда?

Баҳо:
+ | -

"Манчестер Сити" ҳужумчиси Эрлинг Браут Холанд 20 турдан ўрин олган "Вулверхэмптон"га қарши баҳсда хет-трик қайд этганди. Норвегия терма жамоаси аъзоси бу орқали жорий мавсумдаги голлари сонини 25 тага етказиб олди. Бу билан 22 ёшли ҳужумчи Сон ва Салоҳнинг ўтган мавсумдаги рекордини бузиб ташлади. Корея ва Миср терма жамоаси юлдузлари 2021-22 йилда 23 тадан голга муаллифлик қилиб, "Олтин бутса" совринини қўлга киритганди. Ҳозир эса мавсум ярми ва Холанд аллақачон 25 та гол уришга улгурди. Бунда унга "бўрилар"га қарши ўйиндаги хет-трик ёрдам берди.

Қайд этиш керакки, Холанд "Манчестер Сити" сафида 4 марта хет-трик муаллифига айланмоқда. Бу эса уни АПЛ тарихидаги энг тез тўртта хет-трикка эришган футболчига айлантирди. Бундан олдинги рекорд "МЮ" афсонаси Руд ван Нистелройга тегишли эди. Нидерландиялик ҳужумчи 4 та хет-трик учун 65 та ўйин сарфлашга мажбур бўлган. Яна шуни ҳам қўшимча қилиш мумкинки, тарихда фақатгина "Ньюкасл" футболчиси Алан Ширергина бир мавсумда ҳозирги Холанднинг натижасидан яхшироқ, 5 та хет-трик қайд этган (1995-96). Ширер Холанд натижаларига ўз Тwitter саҳифасида шундай изоҳ қолдирганди: "Яна кимдир бир мавсумда 5 та хет-трик қайд этиши мумкинмикин? Менимча, ҳа..."

Холанд, шунингдек, Муҳаммад Салоҳ томонидан ўрнатилган яна бир рекордни янгилашга яқин турибди. Мисрлик ҳужумчи 2017-18 йилги мавсумда 38 та баҳсда 32 та гол уришга эришганди. Буни бузиш учун эса Холандда яна 18 та ўйин мавжуд. Бизнингча, бу иш ёш ҳужумчига чўт эмас.

Эрлинг Холанднинг сўнгги турдаги 3 та голи, "Манчестер Сити"ни босимлардан халос этди. Шунингдек, Пеп Гвардиола томон отила бошлаган танқид тошлари ҳам анча камайди. Эслатиб ўтамиз, "шаҳарликлар" кейинги ўйинини кубок баҳсида, "Арсенал"га қарши ўтказади. Шунингдек, бир турдан кейин АПЛ доирасида ҳам Гвардиола ва унинг армиясини етакчиларга қарши ўйин кутиб турибди.

 

 

 


ИСМАТОВ Ж.

Манба: thesun.co.uk
Киритилди: 21:11, 23.01.2023.
Ўқилди: 1300 марта.
Фикрлар: 3 та.

ЭНГ КЎП ЎҚИЛГАН ЯНГИЛИКЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.