"Manchester Siti" hujumchisi Erling Braut Xoland 20 turdan o‘rin olgan "Vulverxempton"ga qarshi bahsda xet-trik qayd etgandi. Norvegiya terma jamoasi a’zosi bu orqali joriy mavsumdagi gollari sonini 25 taga yetkazib oldi. Bu bilan 22 yoshli hujumchi Son va Salohning o‘tgan mavsumdagi rekordini buzib tashladi. Koreya va Misr terma jamoasi yulduzlari 2021-22 yilda 23 tadan golga mualliflik qilib, "Oltin butsa" sovrinini qo‘lga kiritgandi. Hozir esa mavsum yarmi va Xoland allaqachon 25 ta gol urishga ulgurdi. Bunda unga "bo‘rilar"ga qarshi o‘yindagi xet-trik yordam berdi.

Qayd etish kerakki, Xoland "Manchester Siti" safida 4 marta xet-trik muallifiga aylanmoqda. Bu esa uni APL tarixidagi eng tez to‘rtta xet-trikka erishgan futbolchiga aylantirdi. Bundan oldingi rekord "MYU" afsonasi Rud van Nistelroyga tegishli edi. Niderlandiyalik hujumchi 4 ta xet-trik uchun 65 ta o‘yin sarflashga majbur bo‘lgan. Yana shuni ham qo‘shimcha qilish mumkinki, tarixda faqatgina "Nyukasl" futbolchisi Alan Shirergina bir mavsumda hozirgi Xolandning natijasidan yaxshiroq, 5 ta xet-trik qayd etgan (1995-96). Shirer Xoland natijalariga o‘z Twitter sahifasida shunday izoh qoldirgandi: "Yana kimdir bir mavsumda 5 ta xet-trik qayd etishi mumkinmikin? Menimcha, ha..."

Xoland, shuningdek, Muhammad Saloh tomonidan o‘rnatilgan yana bir rekordni yangilashga yaqin turibdi. Misrlik hujumchi 2017-18 yilgi mavsumda 38 ta bahsda 32 ta gol urishga erishgandi. Buni buzish uchun esa Xolandda yana 18 ta o‘yin mavjud. Bizningcha, bu ish yosh hujumchiga cho‘t emas.

Erling Xolandning so‘nggi turdagi 3 ta goli, "Manchester Siti"ni bosimlardan xalos etdi. Shuningdek, Pep Gvardiola tomon otila boshlagan tanqid toshlari ham ancha kamaydi. Eslatib o‘tamiz, "shaharliklar" keyingi o‘yinini kubok bahsida, "Arsenal"ga qarshi o‘tkazadi. Shuningdek, bir turdan keyin APL doirasida ham Gvardiola va uning armiyasini yetakchilarga qarshi o‘yin kutib turibdi.

ISMATOV J.