"Ньюкасл" ярим ҳимоячиси Бруно Гимараэс Англия лига кубоги биринчи ярим финалида "Саутгемптон" устидан қозонилган ғалаба (1:0) ҳақида фикр билдирди.
25 ёшли бразилиялик футболчи ўз жамоаси билан жуда фахрланишини, айниқса ўз дарвозаси дахлсизлигини сақлаб қолган дарвозабон Ник Поупни алоҳида таъкидлади.
"Биз кўпроқ гол уришимиз мумкин эди, аммо "Саутгемптон"га қарши ўйинда битта гол жуда муҳим. Мен Ник Поупга раҳмат айтмоқчиман. Менимча, у дунёнинг энг яхши дарвозабони", - деди Гимараэс Sky Sports билан суҳбатда.
Бу жамоалар ўртасидаги жавоб ўйини 31 январь куни бўлиб ўтади. Эслатиб ўтамиз, ушбу қарама-қаршилик ғолиби турнир финалида "Ноттингем Форест" - "Манчестер Юнайтед" жуфтлиги ғолиби билан учрашади.
