«Манчестер Юнайтед» клуби ҳужумчиси Уэйн Рунининг фикрича, «Арсенал» ҳужумчиси Робин ван Перси «МЮ» ўйинини янада кучайтира оладиган футболчи экан.
«Жамоага Ван Персидек маҳоратли футболчининг келиб қўшилиши катта воқелик. Жамоа учун ҳам, мухлислар учун ҳам. Агар ўтган йили биз у билан тўпурарлик учун курашган бўлсак, бу йил энди бирга ўйнаймиз.
Мен ҳозирча майдондаги ролим ўзгариши ҳақида ўйламаяпман. Биз ҳозирча бир кунгина бирга шуғулландик холос. Мен ёки Робинга қандай вазифа юклатилишининг фарқи йўқ – биз уни бажаришимиз керак», дея Рунининг сўзларидан парча келтиради «Манчестер Юнайтед» расмий сайти.