Зинедин Зидан бир ярим йилдан ортиқ вақтдан бери ишсиз эди.
Кўпчилик уни Франция терма жамоаси бошқарувида кўришини кутганди, бироқ жамоа жаҳон чемпионати финалига чиққанидан сўнг, Дидье Дешам билан шартнома узайтирилди. Эҳтимол, Зидан клуб даражасида янги иш излашига тўғри келади.
RMC Sport хабарига кўра, Зинедин Зиданга тўртта Европа гиганти даъвогар бўлиб турибди. Ушбу рўйхатга Италиянинг «Ювентус», Германиянинг «Бавария», Испаниянинг «Реал Мадрид» ва Франциянинг «Пари Сен-Жермен» клублари киради.
Айтиш жоизки, Зинедин Зидан «Реал Мадрид» мураббийлик лавозимида аллақачон икки даврни ўтказган. «Қаймоқранглилар» бошқарувида франциялик уч марта Чемпионлар лигасида ғолиб чиққан.
