Словакиялик ҳимоячи Мартин Шкртел инглизларнинг "Ливерпуль" клаби билан янги узоқ муддатли шартнома имзолади, деб хабар берилади клубнинг расмий сайтида. Битим тафсилотлари очиқланмаган.

«Мен жаҳондаги энг йирик клублардан бирининг қисми эканлигимдан бахтиёрман. Ўтган мавсумдан сўнг келажагим ҳақида кўп гап-сўзлар бўлди, лекин айтиб ўтишим керакки "Ливерпуль" билан янги шартнома имзолаш мен учун доим устувор вазифа бўлиб келган. "Ливерпуль" сафида тўп суриш – мен учун шараф, буюк футболчилар, эҳтимол, жаҳоннинг энг яхши ўйинчилари билан бир сафда ўйнаётганимдан ғурурланаман. Умид қиламанки, бу клуб сафида тарих яратаман ва мухлислар доим мени эслаб юришади – келажакдаги бош мақсадим шундай", - деди Шкртел клуб расмий сайтига берган интервьюсида.

Футболчи 2008 йилда Санкт-Петербургнинг "Зенит" клубидан "Ливерпуль" сафига ўтган эди. Мерсисайдликлар таркибида у 176 ўйтказиб, 6 та гол муаллифи бўлган. "Ливерпуль" чемпионатни 8-ўринда якунлаган 2011/12 йилги муваффақиятсиз мавсумдан сўнг 27 ёшли ҳимоячи жамоанинг энг яхши футболчиси, дея топилган эди.