"Арсенал" академияси тарбияланувчиси бўлган Фоларин Балогун мавсум бошида Франция томон йўл олган эди. Ҳужумчи айни дамда "Реймс" сафида ҳаракат қилмоқда ва ички чемпионатда Месси ва Мбаппе каби энг яхши футболчилар қаторида бўлиб турибди. "Канонирлар" мухлислари Балогундан кўп нарса кутишганди. Ҳозирда бу умидлар Францияда бўй кўрсата бошлади. Ҳа, ҳозир "Арсенал"да Эдди Нкетиа энг муҳим фигура бўлиши мумкиндир. Аммо Балогун ҳам ўз навбатини кутмоқда ва вақти келганда "Арсенал" ҳужумида пайдо бўлади.
Балогун Лондон жамоасининг 18 ва 21 ёшгача бўлган таркибида жами 75 та голга муаллифлик қилган. Ҳужумчи ўтган мавсумни Чемпионшипда, "Мидлсбро" сафида ўтказган ва атиги 3 та гол урган холос. Бироқ, унинг 2022-23 йилдаги формаси ажойиб бўлиб турибди. 21 ёшли футболчи дунёнинг энг яхши лигаларидан бирида ўзидан кутилган натижани кўрсата олмоқда. У ўйнаётган "Реймс"нинг ўйинлари ҳам ўзига хосдир. Бу жамоа сўнгги 12 ўйинда мағлубият нималигини билмай келмоқда. Уларнинг "ПСЖ" билан кечган баҳси ўта мураккаб эди. Шунга қарамай, "Реймс" устунлик билан ҳаракат қилди. Хусусан, улар баҳснинг биринчи бўлимида рақиб дарвозаси томон 9 та зарба йўлланган. "ПСЖ"да эса бу кўрсаткич 1 тага тенг эди. Ўйинда на Месси, на Мбаппе рақиб дарвозасига йўл тополмади. Иккинчи таймда Неймарнинг аниқ зарбаси парижликларга устунлик беради. Шундай бир пайтда "Реймс" мардонавор ҳимояланди. Улар ўз вақтини кутди. Аммо анча кеч эди. 95 дақиқа ўтиб бўлган бир пайтда Балогун катта саҳнага чиқди. Ҳимоячилар - Маркиньос ва Рамосни ортда қолдирган "Арсенал" ижарачиси Доннаруммани ҳам доғда қолдира олди. Умуман, ўша кечада "Парк дэ Пренс" ўйингоҳидаги энг совуққон футболчи Балогун эди. Шу сабабли у жамоаси учун бир очкони суғуриб ола билди.
Ушбу ўйин ва Балогун даражаси ҳақида "Реймс" устози Уильям Стилл шундай дейди: "Меҳмонда турнир етакчиси бўлган "ПСЖ"га қарши дуранг ўйнаш мўжизанинг ўзгинаси эди. Биз қаттиқ меҳнат қилдик ва кўзланган натижага эриша олдик. Бизни қўллаш учун келган мухлисларимизни хурсанд қила олдик деб ҳисоблайман. Балогунни супер ҳужумчи деб ҳисоблайман. У – етук футболчи. Унинг техник қобилияти ва тезлиги ҳаммасига имкон беради. Ҳал қилувчи паллалар унинг вақтидир".
Балогун айни дамда 11 та голга муаллифлик қилиб турибди. Бу борада у Мессидан олдинда бормоқда. Агар Балогун шу йўналишда давом этса, "Арсенал" учун яна бир текин юлдуз тайёр бўлади.
ИСМАТОВ Ж.
