"Милан" Рафаэль Леау билан боғлиқ вазият юзасидан баёнот берди.
Аввалроқ “россонерилар” ва Португалия терма жамоасининг 23 ёшли вингери ўртасида янги шартнома бўйича музокаралар тўхтаб қолгани, футболчи янги шартномага товон пулини 70-80 миллион евро этиб белгиланиниши хоҳлаётгани ҳақида хабар берилганди.
"Бугун La Gazzetta dello Sport газетасида "Леау-"Милан": тўлиқ танаффус" сарлавҳаси остида чоп этилган мақолага келсак, "Милан" Рафаэль Леау билан музокаралар тўхтатилмаганига ойдинлик киритмоқчимиз.
Журналистларнинг томонлар ўртасидаги муносабат совуқлашгани ҳақидаги тахминлари нафақат мутлақо асоссиз, балки клуб ва футболчи учун ҳам зарарли.
Ҳақиқатан ҳам, "Милан" Леау ва унинг атрофидагилар билан тинч ва профессионал муҳитда мулоқотни давом эттирмоқда", — дейилади "Милан" баёнотида.
Жорий мавсумда Леау "Милан" сафида барча турнирларда 27 та ўйинда майдонга тушиб, 9 та гол ва 7 та голли узатмага муаллифлик қилди.