Тез орада "Арсенал" билан шартнома имзолайдиган "Челси" ярим ҳимоячиси Жоржиньо "канонирлар" сафига ўтиш олдидан тиббий кўрикдан муваффақиятли ўтди. Бу ҳақда журналист Фабрицио Романо хабар бермоқда.
Манбага кўра, "Арсенал" 31 ёшли италиялик футболчи учун 10 миллион фунт (тахминан 11,4 миллион евро) тўлайди, яна 2 миллион фунт (тахминан 2,3 миллион евро) бонуслар кўринишида тўланиши мумкин. Жоржиньонинг "канонирлар" билан шартномаси 2024 йилнинг ёзига қадар мўлжалланган бўлиб, у яна бир мавсумга узайтирилиши мумкин.
Жоржиньо жорий мавсум “Челси” сафида 25 та ўйинда майдонга тушиб, 3 та гол урди. Transfermarkt портали Италия терма жамоаси футболчисини 35 миллион еврога баҳоламоқда.
