2012 йилнинг 27 август - 10 сентябр кунлари Истанбул (Туркия) шаҳрида шахмат бўйича Бутунжаҳон шахмат Олимпиадаси бўлиб ўтади.
40-бор ташкил этилаётган мазкур йирик мусобақада 170 га яқин давлат терма жамоалари ғолиблик учун дона сурадилар (Бутунжаҳони шахмат Олимпиадаси ҳар икки йилда бир ўтказилади. Сўнгги шахмат Олимпиадасига 2010 йили Россиянинг Ханти-Мансийск шаҳри мезбонлик қилган).
Бу галги Бутунжаҳон шахмат Олимпиадасида Ватанимиз шарафини 10 нафар (5 нафар эркаклар, 5 нафар аёллар) спортчиларимиз ҳимоя қиладилар.
Эркаклар терма жамоаси бош мураббийи Фарход Собиров таркибга Рустам Қосимжонов, Антон Филиппов, Марат Жумаев, Андрей Квон ва Жўрабек Ҳамроқуловларни жалб этган бўлса, аёллар терма жамоаси бош мураббийси Владимир Егин рўйхатидан Нафиса Мўминова, Ирина Геворгян, Сарвиноз Қурбонбоева, Хулкар Тоҳиржонова ҳамда Нодира Нодиржоновалар ўрин эгаллашган.
Сўнгги ўқув-машғулот йиғинини 10-21 август кунлари Тошкент вилоятида олиб борган терма жамоаларимиз аъзолари, 26 август куни Истанбул шаҳрига жўнаб кетадилар.
Эслатиб ўтамиз, Ўзбекистон терма жамоаси Бутунжаҳон шахмат Олимпиадасида энг юқори натижага 1992 йили Манила (Филиппин) шаҳрида бўлиб ўтган мусобақада эришган. Ўшанда, мардонавор спортчиларимиз умумжамоа ҳисобида юздан ортиқ давлат орасида фахрли 2-ўринни қўлга киритишган.
Шавкат Жалилов
Маданият ва спорт ишлари вазирлиги матбуот хизмати
