«Специя» клуби тарихидаги энг яхши тўпурарлардан бири бўлган Франческо Фиори ўзбекистонлик футболчи Элдор Шомуродовнинг трансфери борасида ўз фикрини билдириб ўтди.

— Шомуродовни «Женоа»даги ўйинлари орқали яхши эслаб қолганман. «Рома»да унга қийин бўлди. Боз устига, жамоаниг ўйин услуби унга таъсир кўрсатди. Бундай схемада ўйнаш унга осон бўлмади. Рақобат ҳам таъсир қилмай қолмади, у кам ўйнади. Аммо Римда ҳам у баъзида ўзини яхши томондан кўрсата олди. Унинг ижобий томонлари сифатида тезлик ва координацияни айтган бўлардим. Тўпсиз ҳаракатлари ҳам таҳсинга лойиқ.

— У «Специя»га ёрдам бера оладими?
— «Специя» ҳам Шомуродов «Женоа»да ўйнаган пайтдагидек футбол намойиш этади. Мураббий алмашганидан кейин бу кўзга ташлана бошлади. Мураббий Элдорни Нзолага шерик сифатида кўрмоқда. Улар биргаликда ўйнаб кета олишади, деб ўйлайман. Шомуродов қисқа масофаларда яхши бўлса, Нзола кенг майдондан яхши фойдаланади. Уларнинг ҳар иккиси тезкор ва бир-бирларини тўлдира олишади. Шундай экан, «Специя» Шомуродов орқали таркибни кучайтирди.