Хўжалик суди тегишли қарор чиқарганидан сўнг, "Барселона" Гави билан шартномани расмийлаштиришга муваффақ бўлди. Бироқ, бу ҳикоя ҳали тугамади. АS хабарига кўра, Ла Лига хўжалик суди қарори устидан шикоят қилишга тайёрланмоқда.
Агар Ла Лига апелляцияни ютиб олса, Гави яна рўйхатдан ўтмаган футболчига айланади. Бу ҳолатда иқтидорли ярим ҳимоячи "Барселона"ни тарк этиши мумкин бўлади.
Аввалроқ Ла Лига молиявий шартлар бажарилмагани учун "Барселона"га Гавини рўйхатдан ўтказишдан бош тортганди.
18 ёшли Гави "Барселона" асосий таркибида 75 та ўйин ўтказган. Уларда ярим ҳимоячи учта гол урди ва шерикларига ўн битта голли узатма берди.
