"Манчестер Сити" кўпинча ғалаба қозонади. Ютқазган тақдирда ҳам Гвардиола кўп ҳам баҳоналар қилмайди, бировларни айбламайди. Аммо испаниялик мутахассиснинг айрим пайтлари ишлатган баҳоналари шунчалик ғалатики, уни эшитган одам беихтиёр кулиб юборади. Гарчанд ўзига хос ва ғалати характерга эга бўлсада, Гвардиолани кўпчилик ҳурмат қилади. Аммо "Манчестер Сити" очко йўқота бошласа, унинг ҳаракатлари ва гаплари янада "жиннича" тус олади. Қуйида Гвардиола томонидан ишлатилган энг кулгили баҳоналар ҳақида сўз боради.
Поезд
Яқин вақтлар ичида Манчестер ва Лондон орасини поезд орқали босиб ўтганлар биладики, бу транспорт борасида анчагина муаммолар бор. Гвардиола эса бу муаммодан моҳирона фойдаланди. У ўз жамоасининг "Тоттенхэм"га ютқизиғини Лондонга келиш билан боғлиқ муаммолар билан ҳаспўшлашга уринди. У шундай дейди: Биз энди яна Манчестерга қайтиб кетишимиз керак. Биласизми, Лондонга келиб-кетиш жуда қийин бўлиб қолган. 4 соат ва 20 дақиқа йўлда юрдик. Яна шунча вақт меҳмонхонага жойлашиш учун кетди. Бу ерга келиш инсонни ҳолдан тойдиради".
Тўп – Mitre
"Манчестер Сити" 2017 йилги лига кубоги баҳсида "Вулверхэмптон" билан тўқнаш келади. Ўйин ўта оғир кечиб, нурсиз дуранг билан тугайди. Ўшанда бу натижа сабаби қилиб Гвардиола ўйинда қўлланилаётган тўп ишлаб чиқарувчиси(Mitre)ни айбдор қилганди. У шундай дейди: "Буни қабул қилиб бўлмайди. Тўп юқори даражадаги мусобақа учун умуман яроқсиз. Унинг ранги ўта ёрқин. Футболчиларим ҳам буни тасдиқлашди. Улар тўпни тепишга қийналди. Чунки у ҳаддан ташқари енгил".
Чим
"Кристал Пэлас" билан ўйинларнинг бирида дуранг қайд этгач, Гвардиола бунда "Сэлхурст Парк"нинг чимини айбдор қилганди. Ўшанда испаниялик мутахассис: "Биз ғалаба учун ҳаракат қилдик. Рақибдан кўпроқ имкониятлар яратдик ва ўйинни назорат қилдик. Лекин стадионнинг чими қониқарли эмасди. Бу бизга катта муаммо туғдирди" деганди.
Етарлича футболчи йўқ
Гвардиоланинг даврида "Манчестер Сити" жуда бой клуб сифатида эътироф этилиб келди. Аммо шунда ҳам у футболчилар камлигидан нолиганди. Пеп "Бёрнли" билан дурангдан кейин шундай деганди: "Мен олтитадан ортиқ футболчини танлай олмасдим. Чунки бизда шундан бошқа ўйинчи йўқ эди". Нима ҳам дердик, бу гапга ҳам ишонганмиз...
Клопп
Юрган Клоппнинг "Ливерпул"и "Манчестер Сити" учун энг кучли рақиб саналади. Шу сабаб Гвардиола Клопп баҳоналаридан ҳам унумли фойдаланган. У 2021 йилнинг февралида мерсисайдликларга қарши баҳсдан олдин шундай дейди: "Мен футболчиларимдан нолишимга тўғри келса, баҳона топишим керак. Баҳона эса сизни олға боришдан мосуво қилади. Баҳоналар футболдаги энг ёмон нарса. Мен бошқалар айтган гапга муносабат билдирмаяпман. Юрген ўз сўзларини нима мақсадда айтганини ҳам билмайман. Буни ўзидан сўранг ёки якшанба куни ундан ўзим сўраб кўраман".
ИСМАТОВ Ж.
