«Реал», «Барселона» ва «Ювентус» клублари Европа суперлигаси ғоясини қайта амалга ошириш учун ҳаракатларни бошлашди. Бу ҳақда мусобақа бош директори Бернд Райхарт хабар тарқатди.

А22 компанияси тарқатган хабарга кўра, Европанинг 50дан ортиқ клублари билан олиб борилган музокаралар оқибатида янги лойиҳа юзага келган.

Суперлиганинг янги версиясига кўра, лойиҳа бир нечта дивизионлардан иборат бўлади ҳамда жами 60 тадан 80 тагача клуб иштирок этади. Ҳар бир жамоа бир мавсумда камида 14та ўйин ўтказади. Ҳозирча дивизионларда нечтадан клуб иштирок этиши аниқ эмас.

«Реал», «Барселона» ва «Ювентус» клублари Европа суперлигасининг янги форматини ҳозирча сир сақлашмоқда.

Эслатиб ўтамиз, 2021 йилнинг апрель ойида Суперлигаси илк марта эълон қилинганидан кейин муваффақиятсизликка юз тутганди. Ўшанда «Манчестер Юнайтед», «Манчестер Сити», «Ливерпуль», «Челси», «Арсенал», «Тоттенхэм», «Барселона», «Реал», «Атлетико», «Ювентус», «Интер» ва «Милан» клублари мусобақа таъсисчилари сифатида эътироф этилишганди.