Туркиянинг “Галатасарой” клубининг италиялик ярим ҳимоячиси Николо Дзаньоло янги жамоасида 17-рақам остида ўйнайди. Бу ҳақда клуб матбуот хизмати хабар берди.
Дзаньоло ўз рақамини Туркиядаги зилзилаларда ҳалок бўлган "Галатасарой"нинг 17 ёшли мухлиси хотирасига танлади. Ёш Муҳаммад Эмин Ўзкан ҳам италиялик футболчининг мухлиси бўлган ва унинг севимли жамоаси сафига ўтишини кутган. Ўсмир Дзаньоло трансфери ҳақида расман эълон қилинишидан олдин вафот этган.
"Муҳаммад ва бутун турк халқи учун жуда афсусдаман", - деди Дзаньоло.
Кеча, 8 февраль куни футболчининг "Галатасарой"га ўтгани малум бўлди. Николо Дзаньоло жорий мавсумда “Рома” сафида А Серияда 13 та ўйинда майдонга тушиб, битта гол урди ва 4 та сариқ карточка олди.
