"FIFPro" томонидан 2022 йилда энг яхши ўйин кўрсатган 26 футболчи номи эълон қилинди. Ушбу рўйхатга барча замонларнинг энг яхшиларидан бўлмиш Роналду ва Месси ҳам киритилди. Умумий футболчилар 3 та дарвозабон, 8 та ҳимоячи, 8 та ярим ҳимоячи га 7 та ҳужумчидан иборат эди. Шуни ҳам таъкидлаш керакки, рўйхатдан фақатгина битта инглиз футболчиси ўрин олган.
Лионель Месси нафақат 26 талик гуруҳга, балки рамзий терма жамоага ҳам кириши аниқ. Негаки, у йилни Жаҳон чемпиони сифатида тугатган эди. Бироқ, рўйхатда Роналдунинг ҳам номи бўлиши, кўпчиликни ҳайратга солган бўлса, ажаб эмас. 38 ёшли португалиялик юлдуз 2021-22 йилги мавсумни 24 та гол билан якунлаганди. Аммо жорий мавсумнинг биринчи қисми, Роналду учун фақатгина учта гол билан якунланди. Орадан кўп ўтмай у "МЮ"ни тарк этиб, "Ан-Наср" футболчисига айланди. Рўйхатдан Роналдунинг ҳам ўрин олганига изоҳ берар экан, Пирс Морган, жумладан, шундай дейди: "Унинг тенгдошлари оммавий ахборот воситаларига қараганда Роналдуга нисбатан кўпроқ ҳурмат кўрсатаётгани қизиқ туюлмоқда".
Рўйхатдан, шунингдек, рамзий терма жамоага кириши мумкин бўлган Карим Бензема, Эрлинг Холанд, Роберт Левандовски, Килиан Мбаппе ва Неймар каби ҳужумчиларнинг номлари ҳам жой олган. Шунга қарамай, "Реал"нинг ЕЧЛда ғолиб бўлишига катта ҳисса қўшган Винисиусга у ерда жой топилмади.
Англия терма жамоаси аъзоси ва "Боруссия Дортмунд" ярим ҳимоячиси Жуд Беллингем инглизларнинг рўйхатдаги ягона вакили бўлди.
Ярим ҳимояда Беллингемдан ташқари Каземиро, Кевин де Брюйне, Энцо Фернандес, Гави, Лука Модрич, Педри ва Федерико Вальверделар эътироф этилган. Ҳимоячилар борасида эса АПЛ устунлик қилади. 2022 йилни асосан Англияда ўтказган ҳимоячилар, умумий миқдорнинг ярмини ташкил этди. Улар ичида Жоао Канселу, Виржил ван Дейк, Антонио Рюдигер ва Тиагу Силва бор. Шунингдек, Алфонсо Девис, Йошко Гвардиол, Ашраф Хакими ва Тео Эрнандеслар қолган ўринларни эгаллаган. Ўтган йилнинг энг яхши посбонлари сифатида Алиссон Бекер, Тибу Куртуа ва Эми Мартинеслар номи қайд этилди. Тез орада шортлистдаги футболчилардан ўн биттаси рамзий терма жамоага киритилади.
ИСМАТОВ Ж.
