Туркиянинг Истанбул шаҳрида 40-бор ташкил этилган Бутунжаҳон шахмат олимпиадасига старт берилди. 28 августдан – 9 сентябрга қадар ўтказиладиган мазкур нуфузли мусобақада 156 та эркаклар ҳамда 125 та аёллар терма жамоалари (жами спортчилар сони 1393 нафар) ғолиблик учун дона сурадилар.

Ўзбекистон терма жамоаси ҳам юртимиз Истиқлолга эришгандан буён мустақил жамоа сифатида энг йирик шахмат мусобақаларида иштирок этиб келади. Эътиборли томони, 1992 йили Манила (Филиппин)да бўлиб ўтган Бутунжаҳон шахмат олимпиадасида Ўзбекистон терма жамоамиз муваффақиятли иштирок этиб, умумжамоа ҳисобида 100 дан ортиқ давлат орасида фахрли 2-ўринни эгаллашган.

Мамлакатимиз шахмат усталари ушбу ақл идрок беллашуви юртимизда қай даражада ривожланиб бораётганлигини Туркияда бошланган навбатдаги Олимпиадада ҳам исботлай бошладилар. Қувонарлиси, дастлабки турда ҳам эркаклар, ҳам аёллар терма жамоалари яққол устунлик билан зафар қучдилар.

Эркаклар терма жамоамиз биринчи турда Салвадор термасини 4:0 ҳисобида мағлуб этишган бўлса (Антон Филиппов, Марат Жумаев, Андрей Квон, Жўрабек Ҳамроқулов), аёллар термамиз яманлик шахмат усталарига ҳеч қандай имконият қолдирмадилар ва ушбу беллашувни 4:0 ҳисобида ўз фойдаларига ҳал қилдилар (Ирина Геворгян, Хулкар Тоҳиржонова, Нодира Нодиржонова, Сарвиноз Қурбонбоева)

Бугун ҳар икки гуруҳда ҳам иккинчи тур ўйинлари ўтказилади. Ўзбекистон терма жамоалари бу сафар хорватиялик шахматчилар билан дона сурадилар.