"Милан" Чемпионлар лигаси 1/8 финалида Лондоннинг "Тоттенхэм" жамоасига қарши баҳсда тезкорлик билан ҳисобни очди.

"Россонерилар" ярим ҳимоячиси Браим Диас учрашувнинг 6-дақиқаси 23 сониясида гол уриб, "Милан"нинг Чемпионлар лигасидаги сўнгги 13 йилдаги энг тез голини киритди, дея қайд этади OPTA.

2010 йилнинг февралида машҳур бразилиялик Роналдиньо "Манчестер Юнайтед"га қарши баҳсда 2 дақиқа 11 сонияда гол урди.

Браим Диас учун бугунги гол жорий мавсумдаги бешинчи ва Чемпионлар лигасидаги биринчи гол бўлди. Эслатиб ўтамиз, 23 ёшли ярим ҳимоячи "Реал"дан ижарага олинган.

"Тоттенхэм" ва "Милан" ўртасидаги жавоб учрашуви 8 март куни Англия пойтахтида бўлиб ўтади.