Ўз вақтида "Пахтакор" ўринбосарлар жамоасида ўзини кўрсатиб, кейинчалик "Динамо" сафига қўшилган Павел Пуришкин ҳозирги пайтда Қозоғистон Биринчи лигасида тўп сурмоқда. У "Оқ булоқ" клуби сафида сўнгги ўйинларда кетма-кет голлар уриб келмоқда.
Жумладан, 27 август куни бўлиб ўтган "Актобе-Жас" клубига қарши 21-тур ўйинида (2:0) Павел 2та гол муаллифи бўлган бўлса, ундан аввалги турда у "Каспий" дарвозасини 3 марта ишғол қилганди (24 август, 3:1). Биринчи давра учрашувида ҳамюртимиз "Актобе-Жас"га нақ 4та гол уришга муваффақ бўлганди.
Бугунги кунга келиб, Пуришкин ҳисобидаги голлар сони 12тага етган ва тўпурарлар баҳсида Руслан Мансуров ("Қайрат-Академия, 15) ва Қуаниш Бегалин ("Экибастус", 14)дан кейин учинчи ўринда бормоқда.
Қозоғистон Биринчи лигасида 16та жамоа иштирок этмоқда. 21-турдан кейин "Оқ булоқ" 27 очко билан 10-ўринда бормоқда.