"Ювентус" вингери Анхель ди Мария мавсум якунланганидан кейин фаолиятини қаерда давом эттиришини ҳали билмаяпти.
35 ёшли футболчи ҳозирда Турин клуби билан шартномани узайтириш борасида музокаралар олиб бормаётганини тан олди. Амалдаги шартнома июнгача амал қилади.
“Мен Европада ўйнашни давом эттирмоқчиман, чунки кейинги Америка кубогида ўйнашга умид қиламан. Клубдаги баъзи муаммоларга қарамай, "Ювентус"да бахтлиман, аммо шартномамни ҳали муҳокама қилганимиз йўқ. Бошқа клублар билан ҳам гаплашмадим. Мен учун ҳозир энг муҳими - майдонга тушиш ва фойдали бўлиш. Келажакда нима бўлишини кўрамиз ”, деди аргентиналик ESPNга берган интервьюсида.
