Хабарингиз бор, мавсум бошида «Андижон» ўз сафига тожикистонлик Фарҳод Тоҳировни қўшиб олганди. Лекин тожикистонлик ҳужумчи биринчи давра давомида ўзидан кутилган ўйинни кўрсата олмаганлиги сабабли иккинчи давра арафасида жамоани тарк этганди.

Шундан кейин у юртига қайтиб борди ва тез орада собиқ жамоаси - «Истиқлол» таркибида пайдо бўлди. «Андижон»га айнан «Истиқлол» клубидан ўтганлигини эслатиб ўтмокчимиз. Шу сабабли Фарҳод собиқ клубига қайтишни лозим топди.

Айтиш керакки, Тожикистон чемпионатининг иккинчи давра дастлабки турида «Истаравшан»га қарши кечган беллашувда «Истиқлол» рақибини 4:0 ҳисобида тор-мор келтирди. Мазкур ўйинда Тоҳиров асосий таркибда майдонга тушиб иккита гол уришга муваффақ бўлди ва жамоасининг ғалабасига катта ҳиссасини қўшди.  Айни пайтда «Истиқлол» 26 очко билан 3-ўринда бормоқда.