“Бунёдкор” – “Динамо” учрашувидан кейинги матбуот анжуманининг иккинчи қисмида журналистлар саволларига Миржалол Қосимов жавоб қайтарди.

- Аввало, барчангизни Мустақиллик байрами билан муборакбод этмоқчиман. Учрашувда қайд этилган ҳисобдан қониқдим, бироқ ўйин савиясидан эмас! Биз рақибни тезкор гол эвазига мағлуб этмоқчи эдик. Шу боисдан ҳам баҳсни икки ҳужумчи билан бошладик. Пенальтидан унумли фойдаланганимизда барчаси бошқача тус олиши ҳам мумкин эди. Бироқ футболдаги ёвуз қонун – сен урмасанг, сенга уришади ибораси яна бир бор ўз исботини топди. Илҳом Шомуродов юқори савияли футболчи, “Динамо” ҳам муносиб рақиб. Бугун Илҳом ўз савиясида ўйин кўрсата олмагани рост. Голларимиз рақибнинг ҳатоларидан келиб чиқиб урилди. Бу – футбол! Ҳозирги замон футболида ким камроқ ҳато қилса, ўша жамоа ғалабани илиб кетмоқда. Жасур Ҳасановнинг чиройли голини алоҳида эътироф этиш лозим. Бурчак зарбасини амалга ошираётганимизда ҳимоячиларимизнинг бўйдорлигидан унумли фойдаланишга ҳаракат қиламиз, – деди Миржалол Қосимов.

Миллий терма жамоага таклиф этилган футболчилар тез орада ЎФФ расмий сайтида эълон қилинади. Агарда кимдур жароҳат олса, таркибда ўзгаришлар бўлиши мумкин. Ўзи шундоғам жароҳатлар гирдобига кириб қолдик. Худодан сўраймизки, бошқа жароҳатга йўлиқмаймиз. Нагаев яхши ҳужумчи ва у албатта терма жамоада ўз имкониятига эга бўлади. Бироқ Жанубий Корея термасига қарши ўйнайдиган асосий таркибни ҳозир айтиб бера олмайман, - деб қўшимча қилди терма жамоамиз устози.