"Наполи" клуби ҳужумчи Хвича Кварацхелиянинг маошини оширишни режалаштирмоқда, деб хабар беради La Gazette Dello Sport.
Манба берган хабарга кўра, Италия клуби раҳбарияти мавсум якунида 22 ёшли грузияликнинг вакили билан учрашиб, унга бонусларни ҳисобга олмаганда йилига 2,5 миллион евро маош таклиф қилмоқчи. Эслатиб ўтамиз, ҳозир Кварацхелия 1,7 миллион евро ишлаб олади.
Вингернинг неаполликлар клуби билан амалдаги шартномаси 2027 йилнинг ёзига қадар мўлжалланган. Олдинроқ Грузия терма жамоаси футболчисига Мадриднинг “Реал” клуби қизиқиш билдираётгани ҳақида хабар берилганди.
Кварацхелия жорий мавсум “Наполи” сафида 26 та ўйинда майдонга тушиб, 12 та гол урди ва 15 та голли узатмани амалга оширди.
