20 ёшгача бўлган футболчилар ўртасидаги Осиё кубоги гуруҳ босқичи 1-турида Ўзбекистон ёшлар терма жамоаси бугун Сурияга қарши баҳс олиб борди.

Учрашув Равшан Ҳайдаров шогирдларининг фоллигида бошланди. Вақт ўтиб сурияликлар ҳам бир неча бор хавфли юришлар қилишга муваффақ бўлди. Бўлимнинг иккинчи ярмида устунлик тўлиқ ўзбекистонлик ёшлар томонида бўлди.

37-дақиқада Аббосбек Файзуллаев чап қанотда белгиланган жарима зарбасини қойилмақом бажариб, ҳисобни очди: тўп олис "тўққизлик" орқали тўрга бориб тушди.

Бўлим тугагунга қадар Ўзбекистон вакилларида яна бир нечта голга тортадиган вазиятлар бўлди, хусусан, Нодирбек Абдураззоқов яқин масофадан бўш қолган дарвозани аниқ нишонга ололмади.

68-дақиқада ҳисоб 2:0 кўринишини олди: Файзуллаев тўпни бурчакдан киритганидан кейин рақиб футболчиси боши билан ўз дарвозасини ишғол қилиб қўйди. Қолган вақтда ҳисоб ўзгармади.

Гуруҳнинг нариги ўйинида Ироқ ёшлари Индонезия устидан ғалаба қозонганди (2:0).

Параллел ўтган "B" гуруҳидаги ўйинда Эрон терма жамоаси минимал ҳисобда Қатардан устун келди.

U-20 Осиё кубоги, 1-тур баҳслари
1 март, чоршанба
Ўзбекистон U-20 — Сурия U-20 - 2:0
Голлар: 1:0 – 37 Файзуллаев, 2:0 – 68, автогол Ал-Ҳежжеҳ.
Ўзбекистон U-20: 21. Отабек Боймуродов, 3. Абдуқодир Ҳусанов, 6. Жаҳонгир Ўрозов, 7. Пўлатхўжа Холдорхонов (23. Асадбек Жўрабоев, 90), 8. Беҳрузбек Асқаров (4. Абубакр Ашуров, 90), 10. Умарали Раҳмоналиев, 13. Зафармурод Абдураҳматов, 14. Аббосбек Файзуллаев (16. Шаҳзодбек Раҳматуллаев, 82), 15. Диёрбек Ортиқбоев, 17. Нодирбек Абдураззоқов (19. Шаҳзод Акрамов, 60), 20. Маҳмуджон Маҳамаджанов.
Сурия U-20: 1. Максим Сарраф, 3. Холид ал-Ҳежжеҳ, 5. Амир Ал-Фаёд, 6. Малик Жанир, 7. Ҳасан Усмон (21. Муҳаммад Асад, 87), 8. Маҳмуд Наеф, 9. Закария ар-Рамадон, 10. Маҳмуд Ал-Асвад, 12. Маҳмуд Манна (11. Элиас Сафар, 62), 14. Алмекдад Аҳмад, 15. Муҳаммад Отман.
Огоҳлантиришлар: Абдураззоқов (31), Ал-Ҳежжеҳ (83).

Қатар U-20 — Эрон U-20 0:1
Гол: 0:1 – 65, пенальти Ҳазбавий.