Эртага «ЖАР» стадионида U-20 Осиё кубоги «C» гуруҳи биринчи ўйини доирасида Жанубий Корея Уммонга қарши баҳс олиб боради. Жамоа бош мураббий Ким Ён Жуннинг сўзларига кўра, Корея ушбу турнирда рекорд қайд этади ҳамда 13-марта қитъа чемпионлигини қўлга киритади. Эслатиб ўтамиз, Кореянинг сўнгги муваффақияти 2012 йилга тўғри келади.

«Осиёнинг кучли жамоаларидан бири сифатида бизнинг мақсадимиз аниқ, бу турнирда ғалаба қозониш. Тан олиш керак, бошқа жамоалар ҳам олдинга силжишмоқда, шунинг учун бу қийин бўлади, аммо биз бу қийинчиликка яхши тайёргарлик кўрганимизга ишонамиз», дейди Ён Жун. Корея Республикаси ўз саралаш гуруҳида Мўғулистон, Малайзия ва Шри-Ланкани ортда қолдириб, максимал балл билан гуруҳ босқичига йўл олди.

«Саралаш босқичи бошланганидан буён жуда яхши тайёргарлик кўрдик, айниқса ўтган йил давомида биз бир нечта ўртоқлик учрашувларини ўтказдик. Умид қиламизки, бу уринишлар турнир давомида ўз самарасини бериб, қандайдир натижага эришамиз. Бошқа жамоаларни таҳлил қилиш учун яхши вақт эмас, чунки бизда етарли маълумот йўқ, лекин Уммон саралашда жуда яхши ўйнади ва мусобақадаги энг яхши жамоалардан биридир.

«Бу турдаги мусобақалар мамлакатимиз ва бошқа давлатлардаги кўплаб йирик номларни жаҳонга танитади», — дея таъкидлайди Ким. Уммон ушбу мусобақада бор-йўғи икки марта қатнашган бўлиб, уларнинг энг охиргиси 2014 йилга тўғри келади, ҳар икки ҳолатда ҳам жамоа гуруҳ босқичидан чиққан.

Бош мураббий Дэвид Гордо ўтган йили Уммоннинг бир неча ёшдаги жамоаларини бошқарган. Унинг ўз ватани Испанияда ҳам катта тажрибаси мавжуд. У Уммонга натижа келтирмоқчи, лекин буни ўзига хос ўйин услубини яратиш орқали амалга оширмоқда. «Биз ўз жамоамизни турнирда иштирок этиши учун катта эволюция билан тайёрладик ва мақсадларимизга эришиш учун жамоа билан бир дам бўлиб ишладик», деди Гордо. «Биринчи мақсадимиз – гуруҳ босқичидан чиқиш. Биз мусобақада ғалаба қозониш учун фаворитлардан бири бўлган Корея Республикаси билан муносиб рақобатлашишимиз керак. 10 кундан бери шу ердамиз ва бу ердаги об-ҳаво шароитига мослашдик деган умиддаман.

«Менга Испания федерациясида кўп йиллар ишлаш бахти насиб этди ва у ерда кўплаб истеъдодларни учратдим. Ўйлайманки, бу каби турнирлар футболчиларнинг бўлажак юлдузлар бўлиб етишишида муҳим аҳамиятга эга. Бундай юксак савиядаги мусобақалар бу мақсадга эришишда ёрдам беради». Гарчи биринчи ўйин жиддий қийинчилик туғдирсада, Гордон Уммонни рақибнинг номидан қатъи назар, ўзининг кучли томонларига эътибор қаратишини таъкидламоқда.

«Биз тўрт йилдан бери ўз ўйин услубимиз устида ишлаяпмиз. Корея Республикаси ажойиб жамоа эканлигини биламиз, лекин биз ўз ўйин услубимизга ишонамиз ва ўз услубимиз билан бошқа рақибларга қарши ўйнашга ҳаракат қиламиз. Албатта, бизда бошқа жамоалар ҳақида маълумотлар бор, уларни таҳлил қилдик ва бу маълумотлардан фойдаланиб, уларга қарши рақобатлашишга ҳаракат қиламиз», — деди Гордон.