Муҳаммад бин Ҳаммам томонидан ОФК Устави, ОФК Интизом кодекси ва ОФК Этика кодекси бузилиши туфайли бошланган суриштирув ишлари давом эттирилади. Бу ҳақда ОФК расмий сайти хабар тарқатди.

Хабарингиз бор, 16 июль куни ОФК Муҳаммад бин Ҳаммамни аввал 30 кунга, кейинчалик эса яна 20 кунга ҳар қандай футбол фаолиятидан четлаштириш тўғрисида қарор чиқарганди. Бин Ҳаммамнинг 20 кунлик дисквалификацияга нисбатан берган аппеляцияси эса 17 август куни ОФК Аппеляция қўмитаси томонидан рад қилинди.

20 кунлик муддат эса кеча, 4 сентябрь куни якунига етди. Шунга қарамай, Муҳаммад бин Ҳаммам ҳар қандай футболга оид фаолиятдан четда юришга мажбур. Боиси, ФИФА уни 90 кунга дисквалификация қилган. Бу тақиқ 27 июлдан кучга кирган.

ОФК эса Бин Ҳаммамга қарши суриштирув ишларини ушбу муддат тугагандан кейин давом эттиради.