Ўзбекистон миллий чемпионатининг 18-турида "Бухоро" устидан ғалаба қозонган "Локомотив" жамоаси ўз тарихида янги саҳифа очди. Темирйўлчилар шу пайтгача ички чемпионатларимизда кетма-кет уч ўйинда зафар қучишмаган эди.

Ниҳоят жамоанинг Олий лигадаги саккизинчи мавсумида "Локомотив" яна бир янги рекорд соҳибига айланди. Тўғри, 2005 йилги мавсумда темирйўлчилар кетма-кет учта ўйинда икки бор ғалаба қозонишган. Фақат, ана шу ўйинларнинг сана ёки турлар бўйича кетма-кетлик бузилган. Масалан, 5-8-турлар оралиғида "Локомотив" бирин-кетин "Шўртан"ни сафарда 3-0, "Машъал"ни 2-0 ҳамда "Сўғдиёна"ни 5-0 ҳисобида мағлубиятга учратган эди. Бироқ, жиззахликларга қарши кечган ўйин 8-тур доирасида ўтказилган. 7-турдан ўрин олган "Навбаҳор" жамоаси билан ўтказилиши керак бўлган ўйин эса кечиктирилган ва унда темирйўлчилар Намангандан 3-0 ҳисобидаги йирик мағлубият билан қайтишган.

Шунингдек, 9-11-турларда ҳам "Локомотив" қаторасига ғалаба қозониб, ўз мавқеини мустаҳкамлаб олади. Аммо, 10-турда "Бухоро" жамоаси билан бўлаётган учрашув ноқулай об-ҳаво шароити туфайли тўхтатилган ва кейинроққа кечиктирилган эди. Бу орада жамоалар 11-13-турлардаги баҳсларни ўтказиб бўлишади. Кечиктирилган ўйин эса 14-тур олдидан ўтказилиб, унда темирйўлчилар драматик тарзда кечган баҳсда 4-2 ҳисобида зафар қучишади. Аммо, яна ўша ҳолат – ўйинларнинг санаси бўйича кетма-кетлик бузилган. Бу сафар ҳаммаси ўз ўрнида содир бўлди. Таъкидлаш жоизки, "Локомотив" ушбу мавсумда энг узун мағлубиятсиз серия борасида ҳам ўз рекордини янгилаган эди. Олдинда эса жамоани янги довонлар турибди: бу энг юқори кўрсаткич ва энг кўп очко. Бу борада "Локомотив"га омад тилаймиз.