Ўзбекистон ёшлар терма жамоаси ярим ҳимоячиси Аббосбек Файзуллаев ОФК расмий сайти учун интервью берди.

"Сурияга қарши ўйинда жарима зарбаси белгиланган пайтда Умарали Раҳмоналиев билан жарима зарбасини ким тепишни муҳокама қилдик. Сардоримиз ўзимга ишонаётганимни кўрганидан кейин бу имкониятни менга берди. Ҳар иккимиз ҳам жамоамиз ғалаба қозонишини истаётгандик.

Терма жамоа сафида ўйнаш, клуб сафида Осиё чемпионлар лигасида иштирок этиш — бу барчамиз интизорлик билан кутадиган имконият. Бу орқали биз нималарга қодирлигимизни барчага намойиш этамиз.

17 ёш пайтимда Ўзбекистон олимпия терма жамоасидан таклиф олганим ўзига хос воқеа бўлган. Ахир болаликдан қилган орзуларим аста-секин амалга оша бошлади. Миллий терма жамоа футболкасини кийишни бутун умр орзу қилганман ва бунинг учун сидқидилдан меҳнат қиламан.

Сурияга қарши ўйинда 32 минг мухлис қаршисида боримизни бериб ҳаракат қилдик. Ушбу ғалаба бизга кейинги ўйинлар олдидан ишонч беради. Ғалабали юришни охиригача сақлаб қоламиз, деган умиддаман», — деди Аббосбек Файзуллаев.

Эслатиб ўтамиз, Ўзбекистон ёшлар терма жамоаси бугун Ироққа қарши ўйинда майдонга тушади. Баҳс 19:00да бошланади.